5 нче апрель көнне мәктәбебездә “Мин татарча сөйләшәм”  акциясе кысаларында төрле кызыклы чаралар үтте. Шуларның иң зурысы – йомгаклау концерты. Кичәгә кунаклар да чакырылган иде. “Ак калфак” оешмасының Аксубай районы буенча җитәкчесе Әлфия Рәшит кызы концерт  алдыннан калфак, кәләпүшләр чигү буенча мастер-класслар күрсәтте. Үзәк китапханә хезмәткәрләре китап күргәзмәсе оештырдылар. Үзләре белән бик матур, кызыклы яңа китаплар алып килгәннәр иде, шуларны презентацияләделәр. Концертта I-XI сыйныф укучылары катнашты. Бик матур шигырьләр, җырлар яңгырады, баянчылар төркеме милли көйләребезне башкардылар, биючеләребез тагын бер мәртәбә үзләренең осталыкларын күрсәттеләр. Концерт азагында кызларыбыз барлык кунакларга, тамашачыларга акция эмблемасы  төшкән бүләкләр тараттылар.