Бүген уку йортыбыз җитәкчелеге, күрше Илеш районында, Башкорт аграр- технология көллиятендә булып кайттылар. Эшлекле сәфәрнең төп максаты -чит төбәкләрдә урта һөнәри белем бирү шартлары һәм мөмкинлекләре белән танышу, үзара тәҗрибә уртаклашу.

Көллият Илеш районы үзәге Югары Яркәйдә урнашкан. Уку йортына 1963 елда нигез салына. Бүгенге көндә исә биредә Башкортстанның якын-тирә районнарыннан егет-кызлар махсус һөнәри белем үзләштерә.

Техникумыбыз директоры Ландыш Җәүдәт кызы Шамсунова: " Мондый эшлекле сәфәрләр кирәк дип саныйм. Кайда гына барсаң да, ниндидер яңалык алып кайтасың, үз эшчәнлегеңә тирәнтен анализ ясыйсың, чагыштырып карыйсың. Бүгенге очрашу да шундыйлардан булды. Безнең инде төп максатларыбызның берсе, ветеринария һөнәрен үзләштерү шартлары, андагы мөмкинлекләр белән танышу иде. Уку йортында WorldSkills тәлапләренә туры китерелеп кабинет җиһазландырылган, белем бирү өчен барлык шартлар да тудырылган. Киләчәктә үзебезнең техникумда да бу юнәлештә заманча кабинет булдыруны алмаксат итеп куйдык", дип фикерләрен җиткерде.

Чыннан да, мондый тәҗрибә уртаклашулар эшчәнлегебезне тагы да камилләштерергә ярдәм итә. Техникумыбыз һәрдаим яңалыкка омтыла. Матур күрсәткечләребез, нәтиҗә-җиңүләребез - моңа дәлил.