Хөрмәтле укучылар, укытучылар һәм әти-әниләр! Сезнең барыгызны да бәйрәм белән котлыйбыз. Агымдагы ел районыбызның белем бирү өлкәсендә алтын хәрефләр белән язып куярлык вакыйгаларга бай булды. Татарстан Республикасы Мәгариф һәм фән министры катнашында районыбыз педагогларының август киңәшмәсе булып узды. Тагын бер мөһим вакыйга – районыбызда өр-яңа, заманча җиһазландырылган, 140 урынга исәпләнгән 1 нче Актаныш балалар бакчасы ишекләрен ачты.

Тирән белемле, физик яктан сәламәт, замана кыенлыклары алдында югалып калмаучы яшь буын тәрбияләү – безнең алда торган иң мөһим бурычларның берсе. Балаларга хезмәт тәрбиясе бирүгә дә районыбызда игътибар зурдан. Районыбыз педагоглары яшь буынга белем һәм тәрбия бирүдә барлык алымнарны эшкә җигәләр, үзләренең тәҗрибәләрен, осталыкларын кызганмыйлар. Һәммәгезгә дә ныклы белемнәр, сәламәтлек, иҗади уңышлар, бәхет һәм шатлыклар юлдаш булсын.