Бүген, ягъни 17 октябрь көнне, 2нче санлы Актаныш урта мәктәбенең актлар залында 7-8 сыйныф укучыларының ПДН инспекторы майор Ахунова А.А., районыбыз наркологы Минхузин Л.С. һәм юл йөрү кагыйдәләрен пропагандалау бүлеге җитәкчесе Саетова Р.З.белән очрашу үткәрелде. Очрашуның максаты: укучылар арасында тәртип бозуны, җинаятьчелекне кисәтү һәм булдырмау; соңгы елларда барыбызны да борчыган эчүчелек, токсикомания, наркомания кебек афәтләрне укучылар арасында булдырмау һәм сәламәт яшәү рәвешен пропагандалау; юл йөрү кагыйдәләрен төгәл үтәүне булдыру.

Бәлигъ булмаган балалар белән эшләүче инспектор-майор Ахунова Ания Анил кызы җинаять төрләрен ассызыклап үтте һәм тәртипсезлек кылган укучыны нинди җәза көтүен аңлатты.

Районыбыз наркологы Минхуҗин Ленар Сәүбән улы эчүчелек, наркомания, токсикомания китергән афәтләрне ассызыклап үтте.Балачакта формалашкан яман гадәтләрнең олыгая төшкәч дәвалый алмаслык чиргә китерүен аңлатты, сәламәт яшәү рәвеше алып барырга чакырды.

Юл йөрү кагыйдәләрен пропагандалау бүлеге җитәкчесе Сәетова Рәсимә Заһит кызы юлда килеп чыккан күңелсез, аяныч хәлләрдә җәяүлеләрнең дә гаепләре барлыгына тукталды. Ул үз чыгышында әлеге күңелсезлекләрне киметү, булдырмау максатыннан яктылыкны кире кайтаручы элементларның файдасы турында мәгълүмат бирде һәм юл йөрү кагыйдәләрен төгәл үтәргә чакырды.