2 октябрь көнне һөнәри бәйрәмебез – халыкара Укытучылар көне уңаеннан районкүләм чара уздырылды. Әлеге чарада район Башлыгы Ф.М.Камаев барлык укытучыларны, тәрбиячеләрне, лаеклы ялдагы ветеран укытучыларны күркәм бәйрәм белән котлады, авыр хезмәтләрендә сабырлык, түземлек,  иҗади уңышлар теләде, намуслы хезмәт юлында башкарган нәтиҗәле эшләре өчен рәхмәтләрен җиткерде. Мәгариф идарәсе җитәкчесе Л.Ф.Нурлыева шулай ук барлык мәгариф хезмәткәрләрен бәйрәм белән котлап, ихлас теләкләрен юллады. Әлеге чарада мәктәбебез укытучылары хезмәттәге казанышлары өчен бүләкләнделәр: татар теле һәм әдәбияты укытучысы Камаева Э.Р., инглиз теле укытучысы Ханнанова З.З. Россия Федерациясенең Мактау Грамотасына лаек булдылар. ПНПО кысаларында уздырылган “Россиянең иң яхшы укытучысы” бәйгесе җиңүчесе рус теле һәм әдәбияты укытучысы Усманова Р.А. 200 меңлек сертификат, “Ел укытучысы - 2015” Республика конкурсы җиңүчесе инглиз теле укытучысы Миршарипова Т.К. – 10 меңлек сертификат белән бүләкләнделәр. Тарих фәннәре укытучысы Гимадиев А.Р. Актаныш районы мәгариф идарәсенең Мактау Грамотасына лаек булды. Әлеге укытучыларны зур җиңүләре белән котлыйбыз, иҗади уңышлар, сәламәтлек, гаилә бәхете телибез!