Балаларга кечкенәдән үк әдәплелек, инсафлык, мәрхәмәтлек тәрбияләү ата-аналарның, тәрбиячеләрнең аеруча җаваплы һәм изге бурычы. Димәк, балага үз- үзеңне тоту, аралашу күнекмәләре бирү гаиләдә, балалар бакчасында башлана. Аның нигезендә кешелеклелек, шәфкатьлелек, мәрхәмәтлелек, гаделлек, тыйнаклылык кебек матур сыйфатлар  ята. Шул ук вакытта, буыннардан буыннарга күчеп килә торган тәрбия чаралары искиткеч күптөрле. Мәсәлән, без дә үзебезнең бакчабызда, татар халыкның кагыйдәләре, әйтемнәр, мәкальләр, табышмаклар, җырлы-биюле хәрәкәтле уеннарын кулланабыз. Шулай итеп без балаларның тел байлыкларын үстерәбез, балалар бик яратып өйрәнәләр һәм үзләренең көндәлек эшләрендә, уеннарында, күңел ачу кичәләрендә киң кулланалар.