Ноябрь-декабрь айларында, кышкы суыклар ныгыганчы, су өстендәге боз юка, тиз уалучан була. Кичке һәм төнге суыкларда каткан боз, көндезге кояш астында эреп, калынлыгын сакласа да шактый юкара. Мондый вакытта бозга чыгу куркыныч. Ул кеше авырлыгын күтәрә алырлык дәрәҗәдә түгел. Сулыкларның төрле урыннарында (елга, күлләрдә) бозның калынлыгы бер булса да, аның тыгызлыгы төрле була. Боз өстендәге саксызлык нәтиҗәсендә кешеләр үлемгә дучар була. Гадәттә, бу – балыкчылар һәм балалар. Бәладан сак булуның бердәнбер юлы – куркынычсызлык кагыйдәләрен үтәү. Әти-әниләргә дә балаларына күз-колак булырга, аларны сулыклардан ерак тотарга киңәш итәбез.