Балаларда хәрәкәт активлыгын үстерүнең иң актив юлы – яшь үзенчәлекләрен искә алган дөрес физик тәрбия. Балалар бакчасында физик тәрбия бирүнең формалары булып иртәнге гимнастика, физкультура занятиеләре, чыныктыру чаралары, прогулка, сәламәтләндерү гимнастикасы, спорт уеннары тора. Хәрәкәтне үстерүнең төп формасы итеп мин физкультура занятиеләрен күрсәтер идем, чөнки занятиеләрдә, гомуми сәламәтләндерү мәсьәләләре белән беррәттән, баланың төп хәрәкәтләнү күнекмәләре үстерелә.Закон таләпләренә җавап бирә торган план- конспект төзү, занятиеләрне кызыклы, нәтиҗәле итеп үткәрү өчен төрле методлар уйлап табу занятиеләрне отышлы итә. Физкультура занятиеләре физик хәрәкәтләрне үстерү белән беррәттән акыл тәрбиясе, әхлак, хезмәт һәм эстетик тәрбияләр бирүне максат итеп куя.