Мөселман бала тәрбияле булып, Аллаһ Тәгалә яратканны гына эшли һәм башка мөселманнар белән очрашканда “Әссәләму галәйкум” дип әйтергә тиеш, ә синең белән шулай исәнләшсәләр: “Үә галәйкумуссәлам” – дип җавап кайтарырга кирәк.

Сәлам бирү тәртибе:

~ басып торган, яисә барган кеше утырган кешегә сәлам бирә;

~ аз кеше күп кешегә сәлам бирә ;

~ яшьрәкләр олыракларга сәлам бирә.

Әгәр дә синең белән: “Әссәләму галәйкум үә рахмәтуЛлаһи үә бәракәтуһ” дип исәнләшсәләр, син: “Үә галәйкумуссәлам үә рахмәтуЛлаһи үә бәракәтуһ” дип җавап бирергә тиеш. Әгәр дә сәлам бирүчеләр бер-берсенә кулларын биреп күрешсәләр, пәйгамбәребез Мөхәммәд, галәйһис сәлам, әйткәнчә, аларның гөнаһлары агачлардан яфраклар коелган кебек коела.

Сәламләшү – иң яхшы гадәтләребезнең берсе. Өйдә, урамда, мәктәптә, бакчада, юлда – кайда гына булмасын, бер мөселман икенче мөселман кардәшебез белән очрашканда, аңа сәлам бирү – безнең бурычыбыз.

Пәйгамбәребез, галәйһиссәлам әйткәнчә, сүзне башлаганда сәлам бирмәгән кешенең соравына җавап та бирергә кирәкми. Ә синең белән исәнләшкән кешегә җавап кайтармау – ул гөнаһ! Тагын пәйгамбәребез Мөхәммәд, галәйһиссәлам, сәхәбәләрдән болай дип сораган:

–         Бер-берегезгә карата мәхәбәтегез артсын өчен ни эшлисен әйтимме сезгә?

–         Әлбәттә әйт, я Аллаһның илчесе, – дигәннәр алар аңа. Шунда пәйгамбәребез, галәйһиссәлам, әйткән:

–         Бер- берегез арасында сәлам таратыгыз!

Ягъни, пәйгамбәребез, галәйһиссәлам, бер-беребезгә карата ярату булсын өчен: “Әссәләмугаләйкум!” – дип исәнләшергә кирәклеге турында әйткән.

Димәк, динебездә сәлам бирү бик зур әһәмияткә ия, һәм моны җиңел нәрсәләрдән санап, калдыру һич кенә дә ярамас.