17 июньнән Олы Әтнә балалар бакчасында кызу урак эше башланды!! 2 яшьтән 7 яшькә кадәрле 50 бала, үз чиратлары җитеп, нихаять, әкренләп, бакчабызга беренче тапкыр аяк атлый башлады. Балалардан бигрәк әти-әни өчен бу чор күңелле дә, чөнки балалары яңа үсеш этабына, яңа мөхиткә күчә, шул ук вакытта бик дулкынландыргыч та чор, кечкенә генә нарасыйларын бер белмәгән , күрмәгән тирәлеккә, тәрбияче апалар кулына сакчыл гына калдырып, яннарында бөтерчек булып йөргән сабыйларыннан аерылып калалар. Бүгенге көндә 2-3 яшьлек 11 нарасый адаптация чары үтә. Аларга иң беренче чиратта ягымлы, игътибарлы, сабыр тәрбиячеләребез, тәрбияче ярдәмчеләре һәм бакчабызның шәфкать туташы профессиональ ярдәм күрсәтеп, бу чорны уңышлы гына җиңеп чыгарга ярдәм итәчәк.