Белүебезчә, Украина җирлегендә хәрби операциядә катнашучы егетләребез арасында үз теләге белән Ватанны сакларга китүчеләр дә күп. Шуларның берсе - Олы Мәңгәр мәктәбен тәмамлаган, бүгенге көндә Украина җирлегендә нацизмга каршы көрәшүче егетебез,хәрби көрәшнең тере каһарманы -Вафин Илназ Марат улы. 

Әйе, матур гына тормыш иткәндә, киләчәккә якты уйлар белән яшәп ятканда, бүген илебездәге тынгысызлыкка беркем дә битараф кала алмый. Иңнәренә погон таккан хәрбиләребез генә түгел, "ил", "Ватан", "бурыч" дигән сүзләргә битараф булмаган авылдашларыбыз да бүгенге көндә илебез сагында. 

Илназ Марат улы "Сугышчан операцияләрдә үзен яхшы әзерлекле, хәрби бурычын үтәгәндә  зур җаваплылык һәм батырлыклар күрсәткәне өчен" медале белән бүләкләнеп, ике атналык ялга кайтты. Укучыларга патриотик тәрбия бирү - безнең бурыч. Шул максаттан чыгып, Илназ Марат улын мәктәп укучылары белән очрашуга чакырдык. Очрашу нәфис сүз, чыгышлар, җыр-бию белән үрелеп барды. Мәктәптә укучы барлык егетләр - булачак солдатлар. Хәрби хезмәткә барыр алдыннан үзеңне ничек әзерләргә, кайсы якка өстенлек бирергә, булачак солдатларда нинди сыйфатлар тәрбияләнергә тиеш- туган бөтен сорауларга җавап таптылар егетләр. Очрашу барыбыз өчен дә файдалы узды.