“Игътибар! Игьтибар!“ Боцман Дилбәрнең көчле тавышы безне палубага җыелырга мәҗбүр итте. Бүген без ерак сәяхәткә китәбез икән бит!  Олы Әтнә авылында урнашкан Гатаулла бай Даутов йорт комплексында безне бик җылы каршы алдылар. Әтнә төбәгеннән чыккан атаклы шәхесләребез турында без “Ал җилкәннәр” лагеренда ял итү дәвамында күп тапкырлар сөйләштек, презентацияләр ясадык, бәйгеләр уздырдык. Ә якыннан күрү бөтенләй дә башкача икән.  “Әтнә Туган якны өйрәнү музее“ директоры Гыйлаҗева Эльмира Мәхмүт кызының мөлаем карашы, аңлаешлы сөйләве безгә бик ошады. Без аны тын да алмыйча тыңладык. Бик бай кеше булган икән ул Гатаулла Даутов! Кибетләр тоткан, җигүле атлары куп булган... Шулай булса да, ярлыларга бик рәхим-шәфкатьле кеше булган. Бездә бу шәхескә карата хөрмәт хисләре уянды. Тик ни кызганыч, Гатаулла байның йортын тышкы яктан гына күрә алдык - өй эченә уза алмадык. Әле ремонт эшләре уздырылмаган икән. Тиз араларда спонсорлар табылып, төзекләндереп бетерсеннәр иде дигән теләкләр белән кайттык без экскурсиядән. Туган ягыбыз, аның күренекле шәхесләре белән танышуны без алдагы көннәрдә дә дәвам итәчәкбез дигән фикерләр белән таралыштык без лагерьдан.