Бик борынгы заманнардан ук Ватан сакчысы булу дәрәҗәле, абруйлы һөнәрләрдән саналган. Ил-көннәр тыныч булганда, егет кешенең армия сафларында хезмәт итүе – ныклыкка сыналу ул. Ата-бабаларыбыз үрнәгендә, Ватан сагына басып илебез мөстәкыйльлеген яулаган еллардан алып бүгенге көнгә кадәр егетләребез армиядә хезмәт итеп кайталар. Аларның берсе дә солдат исеменә тап төшермәде, Ватан алдындагы бурычларын намус белән үтиләр.

2016 нчы елның 20 нче февралендә Түбән Көек урта гомуми белем мәктәбенә очрашуга әле күптән түгел генә армия сафларында булып кайткан егетләребез Иске Шимбер авылыннан Шиһабиев Алмаз, Әйшияз авылыннан Газизов Ленар, 4 ел элек хезмәт итеп кайткан шул ук авылдан Хисмәтов Ильяр килде. Алар безне армия тормышы белән таныштырып үттеләр. Балаларның берсе артыннан берсе биргән сорауларына үзләре дә кызыксынып китеп, җөмләләрен бик матур итеп, тулы җаваплар белән сөйләделәр. Укуның ни дәрәҗәдә кирәклеге, солдатка хас булган сыйфатлар, хәрби хезмәткә чакыру кәгазе алгач кичерелгән хисләр, солдатларның тормышы, дезертирларның тормышы, сагынулары, итагатълелек, намуслылык турында аңлаттылар. Очрашу концерт номерлары белән үрелеп 2 сәгать вакытның үткәнен дә сизми калганбыз. Ир-егетләребез өчен кара-каршы утырып сөйләшүнең файдасы тими калмагандыр, дип куаныштык.

Аналарны хөрмәт иткән уллар
Хыянәт итмәс туган иленә.
Илгә тугрылыклы хезмәт итеп,
Чыныгып кайтыр туган җиренә.

Очрашуны технология укытучысы Зарипова Рүзия Сәлих кызы, ул җитәкләгән 10-11 нче сыйныф укучылары үткәрделәр.