Канат ярган нәни кошлар сыман

Талпынасыз очып китәргә,

Яшьтән күңел хисен җилкендергән

Хыялларны чынлык итәргә.

Аерыласыз сөйгән мәктәп белән

Гомерегезнең алсу таңында.

Хәерле юл теләп озатабыз

Саф чәчәктәй тормыш язына.

3 июль көнне Түбән Көек төп гомуми белем мәктәбендә чыгарылыш кичәсе булып узды. Иң тантаналы, истәлекле, шатлыклы, шул ук вакытта бераз ямансу да булган кичәгә җыелдык. Әле кайчан гына белем бәйрәменә беренче тапкыр мәктәп бусагасын атлап кереп кечкенә генә малайлар укырга килгәннәр иде. Ә хәзер аларга 9 нчы сыйныфны тәмамлау турында таныклык алырга вакыт җиткән.

Бүген бәйрәм. Моңсу да, шул ук вакытта шатлыклы да көн бу. Моңсу дибез, чөнки бүген 4 егетебез мәктәп белән, балачак белән саубуллаша. Шатлыклы да, чөнки алда үзенчәлекле яңа тормыш, югары уку йортлары, хезмәт юллары башлана. Кадерле укучылар! Сез хәзер юл чатында басып торасыз. Юллар күп, башта мең сорау: кем булырга, кая барырга, нинди юл сайларга. Нинди генә юл сайласагыз да, чын кешеләр булыгыз, үзегезне сынатмагыз. Мөстәкыйль тормыш диңгезен кичүе җиңел түгел. Ләкин тырышлык, үҗәтлек, үзмаксатчанлык тормышыгызда юлдаш булса, бар да әйбәт булыр. Бәлки берничә елдан бүгенге укучылардан танылган, дәрәҗәле кешеләр, белгечләр чыгар. Уңышлар юлдаш булсын сезгә!!!