Мәктәбебездә татар теле һәм әдәбияты атналыгы кысаларында “Тамчы-шоу” интеллектуаль уены үткәрелде. 10 Б сыйныфы укучыларыннан торган ике команда татар әдәбияты  өлкәсендә үз белемнәрен күрсәтте. Бәйгедә “Яшь җәлилчеләр” (Мияссәрова Адилә, Әхмәтшина Миләүшә, Гыйниятуллина Алия, Ситдыйкова Лиана, Хәсәншина Айгөл, Гараев Динар) һәм “Тукай оныклары”  (Зарипов Ришат, Муллабаева Равилә, Абдуллина Алия, Карпова Эльвира, Сабирова Венера, Шөгаепова Айгөл) командалары көч сынашты. Капитаннар Зарипов Ришат һәм Мияссәрова Адилә үз командалары белән таныштырганда  безгә уенчылар турында шактый кызыклы мәгълүмат җиткерделәр. Уенның программасы урта гасыр әдәбиятыннан башлап XX гасыр башы әдәбиятын үз эченә алган сораулардан төзелде. Сораулар шактый катлаулы булуга карамастан, бәйгедә һәр ике команда көчле әзерлекле булуларын күрсәтте. Бу аларның ел дәвамында тырышып укуларының нәтиҗәсе. Турдан-турга уен кыза барды. Һәр команданың көчләре җиңүгә юнәлттелгәне сизелеп торды. Тур саен жюри әгъзалары нәтиҗә чыгара килделәр. Менә уен үзенең кульминацион моментына килеп җитте. Капитаннарның ярышы тамашачыларны һәм жюри әгъзаларын таң калдырды. Алар үзләренең ни дәрәҗәдә зирәк, тапкыр, төрле өлкәләрдә хәбәрдар булуларын күрсәттеләр. Интеллектуаль бәйге ахырына якынлашты. 3 балл аерма белән “Тукай оныклары” командасы җиңү яулады.

                                                Татар теле һәм әдәбияты укытучысы Мусина Гөлгенә Мөнировна