22 нче мартта Актүбә  икенче урта мәктәбе укучылары  әти-әниләре белән берлектә “Карга боткасы” бәйрәме  уздырдылар. Халкыбызның иң популяр, иң күңелле язгы бәйрәмнәренең берсе -  карга боткасы. Карга  боткасы  бәйрәме  борын-борыннан  килгән  йола. Без  шушы  йоланы  онытмаска,  дәвам  итәргә  тиешбез. 21 нче март көнне, көн белән төн тигезләшкән вакытта, кара каргалар килу хөрмәтенә үткәрелә торган бу бәйрәм халык тарафыннан бик яратылып кабул ителгән. Борын-борын заманда кешеләр нилектән яз булганын белмәгәннәр. Алар ямьле язны җылы яктан кара каргалар алып килә икән, дип уйлаганнар. Шуның өчен карлар эреп сулар ага башлагач, гөрләвекләргә таба, яңаруга-яшәрүгә йөз боргач, каргалар килү хөрмәтенә бәйрәм ясый торган булганнар. “Карга боткасы” йоласы бик борынгы заманнардан ук килә. Әле безгә ислам дине кергәнче, мәҗүсилек чорыннан ук. Димәк, бу-мәҗүси йола. Ә мәҗүсилек-ул ай-кояшка, күккә-җиргә, гомүмән, табигатькә табыну.

         Безнең мәктәп укучылары да бу көнне  матур итеп киенеп бәйрәмгә  җыйналдылар. Бәйрәм алдыннан өйдән өйгә кереп күкәй, ярмалар, җыйдылар.Хуҗаларга рәхмәт әйтеп, изге теләкләр теләделәр. Халыкны бәйрәмгә чакырдылар. Шулай  урап үткәннән соң, безнең мәктәп балалары  ярма, май, сөт алып,  бәйрәмгә килделәр.Ата-аналар учак тергезеп, казан астылар, ботка пешерделәр. Ботка пешкәнче, балалар халкыбызның төрле милли уеннарын уйнадылар,  җырлар җырладылар, такмаклар әйтештеләр. Җиңүчеләргә бүләкләр тапшырылды.Аннан соң, кунаклар белән,  тәмле кайнар ботка ашадык,  бергәләп  кайнар чәй эчтек.

         Ботканы балалар үзләре генә ашап бетермәделәр, аның күп өлешен, каргаларга дип кар өстенә сибеп калдырдылар. Ботка пешерү белән мәш килү балаларга әйтеп бетергесез рәхәтлек бирде. 

         Балалар бу көнне бәйрәмгә хас булган теләүләр әйттеләр Җирдән муллык, күктән яңгыр, кояштан җылылык, табигатьтән бәрәкәт, илгә туклык теләп бер-берсен котладылар.  Кояшлы җылы көннәрнең тизрәк килүен, язгы ташуларның тизрәк агып китүен балалар түземсезлек белән көтүләре турында сөйләштеләр.

        Гореф-гадәтләребезне,бәйрәм-йолаларыбызны онытмыйк! Алар балаларыбызда кешелекнен иң күркәм сыйфатларын тәрбияли.

Жырлый-жырлый,  бии-бии

Бәйрэм  итик  гел  бергә

Яз  бәйрәме  гөрләп  шулай

Барсын  гомер-гомергә

Яз  бәйрәме - нурлы  бәйрәм

Барсын  гомер-гомергә.

 

Язлар  килсен  мул  булып,

Иген  уңсын  кыр  тулып

Дуслар  булсын  һәр  җирдә,

Тынычлык  булсын  илдә,

Әйе  шул, шулай  шул,

Тынычлык  булсын  илдә.

                                                                               Р.Д.Хаҗиева, Л.И.Муртазина,татар теле һәм әдәбияты укытучылары