28 март көнне  Азнакай шәһәре 2 нче һәм 4 нче мәктәбенең 6,8 нче сыйныф укучылары Татарстан Яңа гасыр телевединиесе каналында узган “Тамчы-шоу” интеллектуаль уенында катнаштылар.

2006 нчы елның декабрендә оештырылган әлеге телевизион уенга  районыбыз укучылары 3 нче тапкыр чакырылдылар. 2007 нче елның февраль аенда Азнакай районы җыелма командасы, Сарман районы укучылары белән көч сынашып, җиңүгә ирешкән иде. 2010 елның декабрь аенда Сарлы мәктәбе укучылары командасы, Кама Тамагы районы укучыларыннан белемлерәк, зирәкрәк, җитезрәк икәнлекләрен исбатлап, җиңүгә ирештеләр.

Чираттагы уенда шәһәребез мәктәбе укучылары  уенның 3 турында тигез баллар җыйдылар.  4 турда 2 нче мәктәп капитаны Гарифуллин Зөлфәт капитаннар бәйгесендә  10 сорауга тиз, дөрес җавап биреп, командасына җиңү китерде.

Язгы каникул көннәрендә башкалабыз Казанга барып, бөтендөнья татарлары караган тапшыруда катнашуда  уңайлыклар тудырган мәгариф идарәсе җитәкчесе Дамир Рашат улы Гыйләҗевкә укучылар, җанатарлар, укытучыларыбыз зур рәхмәтләрен белдерә.