Нәүрүз мөбарәк!

         Бүген зур бәйрәм! Дөньядагы барлык төрки халыкларны берләштергән Нәүрүз бәйрәмен каршылыйбыз! Нәүрүз ул –Яңа ел, яңа көн дигәнне аңлата. 21 нче март – язның көн белән төн тигезләшкән,табигатьтә яз башлану көне. Элгәре заманнардан әби-бабайларыбыз бу бәйрәмне зурлап каршы алганнар. Бу көнне кызлар һәм малайлар өйдән-өйгә кереп, хуҗаларга такмак-такмазалар әйткәннәр, аларны бәйрәм белән котлаганнар.

         Без дә бүген, 21 нче март конне, “Төремкәй” балалар бакчасының мәктәпкәчә әзерлек төркем балалары белән Нәүрүз бәйрәмен каршылап үттек. Бәйрәмебезнең максаты: балаларда миллиүзаң тәрбияләү, балаларны татар халкының милли бәйрәме,мәдәнияте, уеннары һәм бию элементлары белән таныштыру,балаларда бәйрәмгә карата уңай тәсирләр калдыру, мәрхәмәтле, игътибарлы ,әхлаклы балалар тәрбияләүдән гыйбарәт. Бәйрәмдә балалар белән күңелле итеп татар халкының “Йомырка ташу”, “Җырлы-биюле” уен кебек милли уеннарын уйнадык, Кыш Бабай белән Нәүрүзбикә аркан тартыштылар, аларга балалар да булышты, “Яз җитә” җырын жырладык, биедек, табышмакларга җавап бирдек. Нәүрүзбикәнең җиңүе уңаеннан балалар тәмле кайнар коймаклар белән сыйланды.

Хуш килдең, Нәүрүз! Хуш килдең, яз!