95 еллык тарихы булган М. Вахитов исемендәге мәктәптә хөрмәткә лаеклы шәхесләр күп эшләгән. Шуларның берсе - Шәфкать Салих кызы Мусина. Ул озак еллар башлангыч сыйныф укытучысы, озайтылган көн группасы тәрбиячесе булып хезмәт иткән. Сугыш чоры авырлыкларын башыннан кичерсә дә, кыенлыклар алдында сынмаган, сыгылмаган. Яраткан хезмәтенә тугры калып, балаларга белем һәм тәрбия биргән. 90 яшендә дә сау-сәламәт, зирәк акыллы. Гимназиянең актлар залында Шәфкат Салих кызын 90 яшьлек юбилее белән Буа шәһәре  башлыгы А.И. Хәбибрахманов, Буа районы хезмәткәрләренең профсоюз рәисе И.Р. Сабирҗанова, гимназия директоры Л.Б. Зиннәтуллин, профсоюз җитәкчесе Ш.С. Гыйззәтуллин котладылар. Юбилей кичәсе укучылар сөйләгән шигырьләр,  матур җырлар һәм биюләр белән үрелеп барды. Кичә ахырында юбиляр укучыларга һәм мәктәп коллективына рәхмәт сүзләре әйтте, уңышлар теләде.