Бүген 21 февраль, безнең лицей-интернатта дөньякүләм туган тел көне билгеләп үтелде. Һәркем өчен телләрнең иң кадерлесе булып, ул беренче сөйләшә башлаган ана теле торырга тиеш. Халыкара туган тел көнендә барлык телләр дә, тигез дип таныла, чөнки аларның һәркайсы кеше язмышы өчен җавап бирә һәм без аны сакларга тиешбез. Телләрне саклау һәм үстерү максатыннан уздырыла торган бу бәйрәм елдан-ел үзенең даирәсен киңәйтә һәм укучыларның яраткан бәйрәменә әйләнеп бара. Шул уңайдан лицей-интернатта “Шигырь сөйлим туган телемдә” дигән кичә үткәрелде. Бу көнне лицей-интернатның актлар залында укучылар татар, чуваш, әзербайҗан, рус телендә яраткан шигырьләрен, җырларын яңгыратты. Һәр чыгыш биюләр белән үрелеп барды.