Әкъдәс Нигъмәт Куратны без соңгы 10-15 елда гына телгә алып сөйли башладык. Ә Төркиядә ул бик билгеле, бөек галим санала икән. Шулай булмыйча соң,авылдашыбыз - Бәркәтәдә туган татар кешесе Төркия, төрекләр тарихын иң җентекләп, иң төгәл язучыларның берсе икән. Әкъдәс Нигъмәт Курат 1903 елда Бәркәтәдә туган. Урау юллар аша, башта Германиягә барып яхшы белем алу, инженер булу турында хыялланса да, 1925нче елдан Төркиядә торып кала. Бик тырышып, төрекләр, төркиләр тарихын өйрәнә, доктор дәрәҗәсенә ирешә. Дистәдән артык чит тел үзләштереп, лекцияләрен дә шул телләрдә укый. 1971нче елда, 68 яшендә, автоавариядә һәлак булган, кабере Истанбулда.

Бүген исә бөек шәхеснең оныклары, оныкчыклары һәм туганнары Бәркәтәгә кунакка кайтты. Бу очрашулар бер традициягә әйләнде дисәк тә ялгыш булмас. Бабаларының туган җирен, туган нигезен сагынып алар ел саен Бәркәтәгә кайта.  Ә без исә ,бу матур традиция дәвамлы булыр дигән өметтә калабыз.