Габдулла Тукайга багышланган атналык бик җанлы үтте. Иң беренче әлбәттә балаларны  Г.Тукай иҗаты белән таныштырдык. Бу эш презентация  күрсәтү белән берлектә, ачылмалы папкалар ясау, китап һәм рәсем күргәзмәләре оештыру белән берлектә барды. Тукай әкиятләре буенча төшерелгән мультфильмнар карау оештырылды.

Төркемнәрдә Тукай шигырьләрен уку һәм ятлау, музыка эшчәнлекләрендә аның җырларын өйрәнү, физик күнегүләр вакытында төрле уеннар уйнау каралды. Татар теле эшчәнлекләрендә дидактик уеннар ярдәмендә Тукай иҗатын, аның әсәрләрен истә калдыруны шарт итеп куйдык. Тукайны искә алу иртәсе балалар өчен истәлекле булды. Төркемнәрдә оештырылган рәсем күргәзмәләре атналыкның төп бизәге булды.