Бүген лицейның 1-4 нче сыйныфларында укучы балалар өчен шигырь бәйрәме оештырылды. Татар сыйныфларында, рус сыйныфларының  татар һәм рус  төркемнәрендә татар телен өйрәнүче балалар үзләрен чын артистларча тоттылар.

Шүрәленең урман мәктәбе “укучылары” – 4 нче б сыйныфы балалары (укытучылары Котбиева Миләүшә Вагыйз кызы) –  залдагы тамашачыларны бик күп нәрсәгә өйрәттеләр: урманда үз-үзеңне ничек тотарга икәнен күрсәттеләр, дару үләннәре белән таныштырдылар, аларның исемнәрен рус теленә тәрҗемә итеп  бирделәр, чәчәкләр, үсемлекләр турында мәкальләр әйттеләр, шигырьләр сөйләделәр. Шүрәлегә Тукай шигырьләрен дә укыдылар, җырлар да җырладылар.

Бәйрәмнең икенче өлешен 2б, 3б, 5б сыйныфларының рус төркемнәрендә укучы төрле милләт балалары (укытучылары Галләмова Гөлия Барый кызы)  дәвам итте. Алар Г.Тукайның “Бала белән күбәләк”, “Кызыклы шәкерт”, “Эш беткәч уйнарга ярый” әсәрләрен сәхнәләштерделәр, балалар өчен язылган бик күп  шигырьләрен сәнгатьле итеп яттан укыдылар. Бәйрәм “Туган тел” җыры белән тәмамланды.