Халкыбызның мәдәниятен, сәнгатен үстерү, телен саклап калу максатыннан республикабызда төрледән-төрле чаралар: концертлар, җыеннар, конкурслар үткәрелә. Мәшһүр артистларыбыз миллилекне саклап калу өчен бөтен җаннарын-тәннәрен биреп тырышалар.  30 нчы апрель көнне 6 нчы а сыйныф укучылары( сыйныф җитәкчесе Шәрифуллина Р.И.), ата-аналар  белән берлектә   Казан шәһәренә Г. Камал исемендәге татар дәүләт академия театры сәхнәсендә куелган атаклы   драматург Т. Миңнуллинның  “Гөргери кияүләре” комедиясен карарга бардылар. Яшь егетләргә, кызларга тәрбия бирү юлларының төрле якларын үз эченә алган бу спектакль тамашачысын көлдереп кенә калмады,  ә уйланырга да мәҗбүр итте. Бердән миллилек булса, икенчедән ата-бабаларыбыздан калган гореф-гадәтләрнең онытыла баруына чаң кагу да яңгырый бу әсәрдә. Кызларны яучылауның төрле юллары бар икәнлеген дә тамашачы аңларлык итеп уйналды.  Гомумән, “Гөргери кияүләре” театры гыйбрәтле дә, уйлатты да, уйнатты да.