Тукай исән, җыры күңелләрдә,

Яшәсәк тә үзен күрмичә,

Тукай килә моңлы сазын уйнап,

Шагыйрьләргә тынгы бирмичә.

Татар теле – минем Туган телем –

Дөньядагы иң-иң камил тел;

Тукай теле, Такташ, Җәлил теле –

Күңел бакчамдагы гүзәл гөл.

26 апрель – бөек шагыйребез Габдулла Тукайның туган көне.

Бу көнне барлык татар дөньясы сөекле шагыйребезнең туган көнен – тууына 135 ел тулуны билгеләп үтә. Район мәдәният йортында да зур тантана булды. Районның төрле мәктәпләреннән килгән “артистлар” Тукай бәйрәме – туган тел бәйрәмен оештырдылар. Иң сәнгатьле шигырь укучылар шагыйрьнең төрле елларда иҗат ителгән шигырьләрен укыдылар, әкиятләрен сәхнәләштереп күрсәттеләр.

Лицеебызның 4 нче а сыйныфы укучылары (укытучылары Мөхәммәтшина Гөлфирә Минәхсән кызы) “Шүрәле” әкиятен сәхнәләштерделәр. Урманга җиләк җыярга килгән кызлар да, тапкыр егет Батыр да , Шүрәлеләр дә үз рольләрен бик оста уйнадылар.

Тамаша бер сулышта узды.

Бәйрәм кичәсен барыбыз бергә "Туган тел" җыры белән тәмамладык.

Бәйрәмнән күтәренке кәеф, зур канәгатьләнү хисе, рухи яктылык алып кайттык.