Бу көннәрдә барлык мәктәпләрдә дә  зур әзерлек белән  парламент дәресләре үтә.  “ Законнар кайда туалар ?” дип исемләнгән дәресләр безнең мәктәптә  дә һәр сыйныфта үткәрелде.  Һәр елны парламент дәресләре һәм тарих елына багышланган сыйныф сәгатьләре үткәрелүгә карамастан, 5 сыйныф укучылары  мәктәп директоры- Яңа Ишле авыл җирлеге муниципаль район Советы депутаты Абдрахманов Шамил  Мөбәракҗан улының сорауларына җавап биргәндә  бераз каушап  калдылар. Ләкин  Республикабызның символлары ,Төп законы- Конституция турында   дөрес  җаваплар бирделәр.  Илебезнең һәм Республикабызның башлыкларын  белүләрен күрсәттеләр.  Дәрестә  катнашкан  9 нчы сыйныф укучылары да , законнарның кайда тууы, парламент, аның эшчәнлеге турында бирелгән сорауларга дөрес җавап  бирделәр.  5 нче һәм 9 нчы сыйныфларда  парламент дәресен  тарих һәм җәмгыять белеме фәннәрен  укытучы   Илнур Закиров  үткәрде.  Алдан әзерләнгән презентацияләр һәм видеофильмнардан  өзекләр күрсәтелгәнгә күрә, дәресләр тагын да тулырак, җанлырак, кызыклырак үтте.  Парламент дәресләрендә ике сыйныф җитәкчесе – Гөлинә Вильданова  `һәм  Гөлинә Насибуллиналар  да катнашты. Алар, укучыларга өстәмә сораулар биреп,  әңгәмә оештырдылар.   Үткәрелгән дәреснең  әһәмияте бик зур.  Ул Татарстан Конституциясенең  20 еллыгына багышланды.  Балалар үзләренең  конституцион хокукларын  тагын бер кат искә төшерделәр.