Күптән түгел  район мәдәният йортында “Мирас” җурналының баш редакторы Илфак Мирза улы Ибраһимов, Ш.Мәрҗани исемендәге Тарих институтының урта гасырлар бүлеге мөдире, тарих фәннәре докторы Илдус Заһидуллин һәм баш мөхәррир урынбасары-җаваплы сәркатип-Рамил Ханнановлар белән бик истәлекле очрашу булып узды. Очрашуда Чүпрәле районы методик мәгълүмати үзәге методисты Резида Рауф кызы Мөдәрисова,  Ахметов Сирин Линарис улы, район мәктәпләренең татар теле һәм тарих укытучылары, мәктәп, авыл  китапханәчеләре катнашты.

Халкыбызның чын тарихын, милли идеясен, әдәбиятын тирәнтен ачып биргән  “Мирас” журналының кабат нәшрият дөньясында  үзенең лаеклы урынын биләве нык шатландырды. Кунакларның журнал турындагы чыгышлары халкыбызның тарихына, мәдәниятенә, әдәбиятына битараф булмаган  һәркемнең күңелендә кызыксыну хисләре һәм аны алып уку теләге уятты. Шушы очрашуда катнашып,тарихыбызга багышланган  яңалыклар белән танышуым һәм Илфак әфәнденең тирән мәгънәле, искиткеч эчтәлекле шигырьләрен тыңлавым  белән мин үземне бәхетле санадым.

                                         Яңа Кәкерле төп гомуми белем бирү мәктәбенең

                                                 татар теле укытучысы Гөлинә Насибуллина.