24 нче май иртәсендә безнең мәктәп, Яңа Кәкерле урта мәктәбе, күп кенә кунаклар кабул итте.Чөнки бу көнне 9 нчы сыйныфларның “Соңгы кыңгырау” тантанасы һәм”Без – мишәр егетләре” дип исемләнгән очрашу кичәсе булып үтте. Кунаклардан “Татавтодор” ачык акционерлык җәмгыятенең Чүпрәле филиалы директоры Газинур Хакимов,шушы мәктәпне тәмамлап, очрашу кичәсенә чакырылган авылдашларыбыз “Татстрой сервиз”ның оешмасы директоры Азат Мөхәррәм улы, район администрациясендә озак еллар җитәкче вазыйфаларын башкарган һәм бүгенгесе көндә һөнәри училищеда директор ярдәмчесе булып хезмәт итүче Иршат Заир улы Закиров, җаваплыгы чикләнгән “Таттрансгаз” берләшмәсенә караган газ бирү автомат станциясе белгече Дамир Мөнир улы Әхмәтҗановлар да бар иде. Залның түрендә ветеран укытучыларыбыз , мәчет картлары урын алды. Зал авылдашларыбыз белән тулы иде.Кунаклар чыгарылыш укучыларына изге теләкләрен әйтеп,истәлекле бүләкләрен тапшырдылар.Укучылар да һәм әти-әниләре дә бик рәхмәтле калдылар.

Кичәнең икенче өлешен татар теле укытучысы Гөлинә Фатих кызы алып барды.Районыбызның төрле тармакларында хезмәт итсәләр дә, әдәби хәрәкәт үзәгендә кайнаган, тирән өчтәлекле,мәгъ-нәви фикерле шигырьләр иҗат итүче талантлы авылдашларыбыз  Азат абый ,Иршат абый,Дамир абыйларның  шигырьләрен, Иршат абыйның  җырларын тыңлаганнан соң, күңелләребездә авылдашларга карата   хөрмәт һәм соклану, алар  белән  горурлану  хисләре  туды.

Үзе  язган шигырьләргә  көй  язып,  аны  үзе  үк  башкарган   Дамир абый  чыгышын  авыл халкы  озак  алкышлады.  Кичәдә  2нче  сыйныф   укучысы Алимов Ленар, 4-5 нче  сыйныфтан   Әхмәтҗанова  Илүзә,    Закиров Айваз, 10  нчы  сыйныфтан Эльмира  һәм  Энҗе  Хакимовалар  кунакларның һәм үзләренең  шигырьләрен яттан  сөйләделәр. 6 нчы сыйныф укучысы  Хайруллина  Язилә   матур  җыры  белән кичәне  тагын да   ямьләндерде.  Күп  санлы   авлдашларыбызның соравы  буенча, Сария апа  Халилова  моңлы  җырын  сузды,  ә Садыйкова  Диләрә  апа  татар халык биюен  башкарып,  барыбызның  да  күңелен  күтәрде.  Бәйрәм  кичәсеннән  барысы да  бик  канәгать  калды.  Очрашу  кичәсенең  бар  чыгымнарын  Азат  Мөхәррәм  улы  каплады.  Авылыбызның  киләчәгенә  битараф  булмаган,талантлы шәхесләребезгә ихтирам,хөрмәт белән караган  авылдашлар  мондый  кичәләрне  ешрак  үткәрәсе  иде  дигән  теләктә  калдылар.