Яңа Кәкерле урта мәктәбендә”Мин татарча сөйләшәм” акциясе старт алды.

Акциянең тәүге адымы буларак,  халыкара туган тел көненә багышланган “Туган телем- назлы гөлем “ дип исемләнгән кичә булып үтте.Кичәдә беренче сыйныф укучылары туган телгә багышланган шигырьләр укыдылар,җырлар башкардылар.Икенче өлешендә исә,туган телен,туган авылын чиксез яраткан авылдашыбыз,  Чүпрәле муниципаль районының “Строй сервис” ябык акционерлык җәмгыяте   генераль директоры  Азат Мөхәррәм улы Вахитовның “Гомерем агышлары” дип исемләнгән китабын тәкъдир итү булды.Китапта шагыйрьнең төрле елларда иҗат ителгән шигырьләре урын алган. Укучылар авторның шигырьләрен  сәнгатьле итеп укып кына калмадылар,берничә шигырен анализлап, автор белән  фикерләренең туры килүенә инандылар.Кичә барышында Азат Мөхәррәм улы Вахитовның томыш юлы,иҗаты яктыртылган презентация күрсәтелде.

Азат Мөхәррәм улы укучыларның күптөрле сорауларына җавап биреп утырды һәм яңа гына язган шигырьләрен укып,кичәдә катнашучыларны сөендерде. 

Бәйрәм кичәсен тел укытучысы Гөлинә Фатих кызы Насибуллина әзерләде һәм алып барды. Ул авторга төрле кызыклы сораулар биреп , кайбер шигырьләрнең язылу тарихына ачыклык кертте. Бәйрәм бик күңелле үтте.

Бәйрәм ахырында Азат Мөхәррәм улы укытучыларына, шигырьләрен сәнгатьле укыган укучыларга, мәктәп китапханәсенә китапларын бүләк итте.

Киләчәктә дә талантлы авылдашларыбыз безне сөендереп торыр дигән өметтә калабыз.

                                  Яңа Кәкерле урта мәктәбе  китапханәчесе:Вилданова Дилүзә Иршат кызы.