Нарăс уйăхĕн 25-мĕшĕнче урамра кунĕпех çил- тăман алхасрĕ. Эх, вĕçтерет! Çак çанталăка пăхмасăр Упири вăтам шкул ачисемпе вĕрентекенĕсем, шкул умĕнче Çăварние ăсатрĕç. Шкул ачисем эрне малтан уява хатĕрленме пуçларĕç. 7-мĕш класран пуçласа 11-мĕш класс таранччен ачасем Çăварни юррисем юрлама вĕренчĕç, арчасенчи асаннесен авалхи тумĕсене якатрĕç, çӳçеллĕ тутрисене тупса хучĕç. Уява 11-мĕш класра вĕренекенсем ертсе пычĕç.. Вĕсем Çăварни юрри-ташшисемпе, шÿтлĕ сăвă-такмаксемпе вĕренекенсене савăнтарчĕç.Çавăн пекех Л.П.Сердцева ертсе пыракан фольклор ушкăнĕ хăйĕн пултарулăхĕпе куракансене тĕлĕнмеллипех тĕлĕнтерчĕ.10-мĕш класра вĕренекенсем „Блины” юрра шăрантарчĕç. Ачасем çунашкасемпе тата йĕлтĕрсемпе ярăнчĕç, тĕрлĕ ăмăртусем, вăйăсем выляса савăнчĕç. 11-мĕш класра вĕренекенсем çуллă икерчĕ - кукăльсемпе хăналарĕç, вĕри чейпе сăйларĕç. Çăварни йăли-йĕркине чăваш чĕлхипе литературине вĕрентекен Н.А.Сердцева тытса пычĕ. Акă Çăварни Карчăккин кĕлеткине çунтарма та вăхăт. Пĕтĕм усал- тĕсел, чир-чĕр, хаяр хĕл кая юлтăр! «Гори, гори ясно, чтобы не погасло!» — тесе, Çăварни Карчăкки кĕлленсе пынине сăнарĕç. Ачасене уяв питĕ килĕшрĕ.