Бүген безнең гимназиядә бик матур бәйрәм узды. Ул “Сөмбелә гүзәле” дип аталды. Һәр сыйныф үзенең иң гүзәл, уңган һәм туган телен камил белгән кызын әзерләде. Бәйрәм 1-4 нче һәм 5-10 нчы сыйныф укучылары арасында бүленеп уздырылды. Һәр катнашучы, өйгә эш буларак, үзе белән таныштыруны, бәйрәм белән бәйле киемне әзерләргә тиеш иде. Кемдер җыр җырлады, кемдер шигырь сөйләде, биеде, ә кайбер катнашучылар сыйныфлары белән бергә сценкалар да күрсәттеләр. Аларны 9 нчы һәм 10 нчы сыйныф укучыларыннан торган мәртәбәле жюри бәяләде. Үзләрен тәкъдим иткәч, катнашучы кызлар “Яшелчәләрне таны”, “Табышмаклар”, “Сүзләрне таны” бәйгеләрендә көчләрен сынаштылар. Бәйрәм ахырына “Сөмбелә гүзәлләре” билгеләнде (Ямалеева Әдилә һәм Якупова Диләрә). Калган кызлар да төрле номинацияләрдә дипломнар белән бүләкләнделәр. Бәйрәм һәрберебезнең күңелендә җылы хисләр генә калдырды.