15 нче апрель көнне Алабуга шәһәренең 9нчы урта мәктәбендә шәһәркүләм яшь белгечләр фестивале үтте. Әлеге чарада шәһәребезнең  төрле мәктәпләреннән килгән яшь укытучылар катнашты. 9 нчы урта мәктәп укытучылары килгән кунакларга ачык дәресләр һәм дәрестән тыш чаралар күрсәттеләр. 5нче сыйныф укучылары белән   татар  әдәбиятыннан “Тукай иленә сәяхәт” дигән дәрестән тыш чара үткәрелде. Бу дәрестән тыш чараның Габдулла Тукайга багышлануы юкка гына түгел, чөнки 26 нчы апрель көнне бөек шагыйребез тууына 130 ел була.  Укучылар 2 командага бүленделәр һәм беренче турда кроссворд  чиштеләр, икенче турда  Г.Тукайның тормыш юлы һәм иҗаты буенча сорауларга җавап бирделәр,  өченче турда шагыйребез иҗат иткән әкиятләргә, шигырьләргә нигезләнеп төшерелгән мультфильмнардан өзекләр карадылар  һәм шулар буенча биремнәр үтәделәр, дүртенче турда исә катнашучылар Г.Тукай иҗаты буенча проект эше эшләделәр. Дәрестән тыш чараның ахырында  барлык катнашучылар да татар халкының гимнына әверелгән “Туган тел” җырын башкардылар. Укучылар чарада бик теләп катнаштылар һәм актив булдылар. Яшь укытучы һәм 5в сыйныфы җитәкчесе Әхтәмова Гөлчәчәк Фәиз кызы үзенең бар осталыгын җыеп үткәргән бу чара бик күпләрнең күңелләрендә озак сакланыр, дип ышанып калабыз, укытучыга иҗади уңышлар, күңел байлыгы телибез.