Татар теле һәм әдәбияты атналыгы дәвам итә. 21 февраль  көнне  туган телгә багышланган газеталар күргәзмәсе  ачылды. Иң беренчеләрдән булып газетаны өлгертүчеләр - 8 һәм 6 класслар. Тиздән жюри нәтиҗәләр чыгарып, иң эчтәлекле газетаны билгеләячәк.

Спорт-сәламәтлек айлыгы кысаларында  мәктәптә чаңгы ярышлары уза.  Ярышларда барлык укучылар да  актив катнаша, чөнки мәктәп барлык балаларга җитәрлек чаңгы белән тәэмин ителгән. Бу зур бүләкләре өчен нефтьчеләргә зур рәхмәтебезне белдерәбез.

Мәктәбебездә 15 нче февраль – Әфган җирендә һәлак булган сугышчы-интернационалистларны искә алу көненә багышланган әдәби-музыкаль чара үткәрелде. Әфган сугышында Ватан куйган бурычын үтәгән авылдашыбыз Насыйров Камил Һади улы безгә кунак булып килде. Укучыларның сорауларына:

 - Ватан кая җибәрә – шунда барасың. Без ул вакытта патриотлар идек, армиягә бармау хурлык саналды. Ул елларны югалган вакыт дип санамыйм. Сугыш та, яшьлек тә, романтика да булды Әфганстанда. Бүгенге егетләргә теләгем шул: тәмәке, наркотик кебек яман гадәтләр белән мавыкмасыннар иде. Илебезне яклар, сау-сәламәт чын ир-егетләр булып үссеннәр, - дип үзенең теләкләрен җиткерде.        

              Еллар уза, дөньяга яңа буыннар килә. Әмма канкойгыч сугышлар турында онытырга беребезнең дә хакы юк! Армия сафларында хезмәт иткәндә яшь гомерләре вакытсыз өзелгән Татарстан улларының якты истәлеге алдында баш иябез!