Кояш нурларының шәфкате көннән көн көчлерәк, яз җиленең назы мулырак булган мизгелләр җиһанда. Ирексездән күңел уяна, сулыш иркенәя, яшәү көче арта. Табигать шулай яралган ки, яз җитү белән хәммә нәрсә хәрәкәткә килә. Җир ананың уянуы белән бер рәттән, күренекле даталарга бәйле әдәби-музыкаль кичәләр, төрле юнәлештәге бәйге-конкурслар һәм иҗат үзәкләрендә еллык нәтиҗәләрне йомгаклап отчёт концертлары гөрли башлый. Шундый концертларның берсе 28нче апрель конне 1нче санлы балалар һәм яшьләр иҗат сараеның “Нур” милли мәдәниятне һәм сәнгатьне өйрәнү үзәгендә узды. “Замана” театр берләшмәсе һәм “Ника” заманча бию төркемнәре ата-аналар һәм килгән кунаклар алдында имтихан тоттылар. Ел буенча төрле бәйгеләрдә катнашып призлы урын алган биюләр, укучыларның аерым чыгышлары тирән эчтәлектәге сценарий белән үрелеп барды. Кичә үзенә бер төрле бәйрәм төсе алды. Иҗат сарае һәм төркем тормышында актив катнашкан укучыларны билгеләп китү, дипломнар тапшыру оештырылды. Бәйрәмгә килгән һәр кеше матур музыка, дәртле бию, сәнгатьле сөйләмдә үзенең күңеленә хуш килердәйне  тапты.