Нишләп шулай телгә кергәндер исә, шәһәр балалары каникул җитүгә авылларга, якын-тирә ял лагерларына китә дип сөйләшергә күнеккәнбез. Тик менә ничә ел рәттән Яр Чаллы шәһәре мәгариф учреждениеләре каникул вакытларында шәһәрдә калган балаларның ялын күңелле һәм файдалы оештыру буенча бик нәтиҗәле эш башкара. Моңа спорт һәм ял мәйданчыкларында төрледән төрле ярыш, күңелле концерт программалары үткәрү керә. Шундый ял мәйданчыгы атнаның һәр чәршәмбе көнендә безнең Иҗат сараебызда да эшләп килә. 6нчы июль көнне ул үзендә 52нче, 51нче, 26нчы, 28нче, 29нчы мәктәп укучыларын “Кызу җәй” дип исемләнгән күңелле стартлар ярышында очраштырды. Һава торышының кызулыгына уеннарда катнашкан балаларның узышу теләгенең кызулыгы, җанатарларның көч бирү кызуы да өстәлеп, “Кызу җәй” уены үз максатына иреште. Шунысы сөендерә мәктәп укучыларыннан тыш иҗат сарае янына велосипедта йөрергә, саф һава суларга,уйнарга  килүче балалар саны да егермедән артык. Алар да “Нур” милли мәдәниятне һәм сәнгатьне өйрәнү бүлеге, “Кама” бүлеге укытучылары оештырган кызыклы уеннарда катнашып рәхәтләнеп ял иттеләр. Кадерле балалар, без сезне һәр чәршәмбе үзебезнең Иҗат сарае ишегалдында күңелле ял мәйданчыгында көтеп калабыз!