Чынлап та бит, тормыша күп нәрсә “а” хәрефеннән башлана бит - ана, ата, апа, абый, азан... Алфавитта да бит бу хәреф иң беренче тора- иң элек шушы хәрефтән  укытучы баланы иҗекләп укырга, пөхтә итеп язарга өйрәтә - зур, катлаулы тормыш юлына алып чыга. Үз гомерен балалар укытуга багышлаган кешеләр әлбәттә, бик күп - шулар арасында Бөек Җиңү бәйрәме алдыннан 95 яшен тутырган  Гөлсем Хабибулла кызы Биктимирова да бар.

   Без “Нур” милли мәдәниятне һәм сәнгатьне өйрәнү бүлеге хезмәткәрләре Өлкәннәр көне уңаеннан Гөлсем апа һәм аның кызы Зәвия апаларда кунакта булып кайттык. Бик олы яшендә булуына да карамастан аек акыллы, яхшы хәтерле, үзенең бу тормышта дөрес яшәгәнлегенә инанган , бар нәрсәдән дә кәнәгать , выкытында бишнамазын укыган, шул ук вакытта бүгенге тормыш яңалыклары белән дә кызыксынып, танышып барган , олы күңелле –чын татар әбисе каршы алды безне. Гөлсем апа үз башыннан үткән катлаулы , шул ук вакытта яшьләргә генә хас дәртлелек белән комсомол хәрәкәтен оештырып йөрүе, районнан килгән яшь инструктор - Гордан Хаммат улы белән танышып, уртак тормыш корып җибәрүләре, авыр сугыш еллары, балалар укытуга багышланган тормыш юлы турында да, бәйнә-бәйнә сөйләп бирде. Без Гөлсем апаның ушлылыгына, тормыштан бер генә дә туймаганлыгына, ике сүнең берсендә укыткан укучыларың исемнәрен  искә төшереп алуына сокланып, горурланып утырдык. Ходай сезгә исәнлек- саулык бирсен, безнең арада тагын күп еллар яшәргә язсын.Амин.