Нихаять ул көн килеп җитте! Әйе, әйе, нихаять дим, чөнки бу көнне балалар ниндидер бер бәйге кебек түгел, ә зур бәйрәмгә әзерләнгән төсле көттеләр. Сүзем “Татар кызы 2016 нәни энҗеләр” бәйгесенең финал туры турында. Бәйге башлангыч сыйныфлар арасында тәүге тапкыр үткәрелүгә карамастан бик киң җәелеш тапты. Барысы шәһәребезнең 42 мәктәбеннән берсеннән берсе талантлы, уңган, татар телен камил белгән укучы кызларыбыз катнашты. Бәйгедә мәктәпкәчә балалар арасында уздырылучы “Татар кызы”нда ныгыган кызлар белән бер рәттән, әле тәүге адымнарын сәхнәгә атлаучы укучыларыбыз да бар иде. Финал турына иң-иңнәр дип табылучы 10  кыз узып 15нче декабрь көнендә алар бер сәхнәдә очраштылар. Бу көн искиткеч чыгышлар, кызыклы очрашулар, кайнар котлаулар, матур сүзләр, бүләкләр һәм балаларның шат авазларына бай булды. Бәйгенең төп темасы булган “Нәсел җебем”сүзтезмәсе бәйгенең буеннан буена, һәр финалистның чыгышында чагылып үзенә бертөрле бербөтен хасил итте. Нинди генә талантлы гайләләр, һөнәр ияләре ачмадык без бу бәйге барышында?! Катнашкан кызларыбыз белән беррәттән аларны әзерләүче укытучыларын да билгеләп үтәсе килә. Талантлы бала бер мәсьәлә, ә аны тиешле дәрәҗәдә әзерләү әлбәттә укытучыларның зур хезмәте. Бер тында каралучы әлеге бәйгенең нәтиҗәләре дә билгеле. “Татар кызы 2016 нәни энҗеләр” бәйгесенең төп җиңүчесе 29нчы гимназиянең 4нче сыйныф укучысы Ләйлә Әхмәтова.

Бәйге түгел, ә матурлык, гаилә һәм талант бәйрәме булды бу. Киләсе елларын гына көтәсе калды.