Йолдызлар, йолдызлар... Табигатьнең аңлатып бетерә алмаслык, бик тә гаҗәп һәм матур әлеге күренешләре белән кемнәр генә сокланмыйдыр. "Созвездие-Йолдызлык" фестивале тарафыннан ел саен ачыла торган талантларны да нәкъ менә шул йолдызларга тиңләп булыр иде. Никадәр  искиткеч талантка ия балалар катнаша әлеге бәйгедә. Вокал, хореография, конферас номинацияләрендә көч сынашучы балалар арасында чыннан да чын профессионаллар дәрәҗәсендә чыгыш ясаучылар булу күңелне күтәрә.

Бу елда безнең нәни конферансларыбыз Азилә Сиразиева һәм Айнур Исмагиловлар да үз көчләрен сынап карарга булдылар. Уңышлы гына чыгыш ясап, зона турына узып, бүген, ягъни 9нчы март көнне "КамАЗ" мәдәният йортында чираттагы концерт номерларын игълан иттеләр. Әйтергә кирәк, чыгыш ясаулар җиңелләрдән генә түгел. Тукай районы, Алабуга, Минзәлә, һәм Яр Чаллы шәһәрләренең иң-иңнәре генә җыелган ич әлеге турга. Ләкин шулай булуга карамастан, безнең чыгышлар жюри күңеленә кереп калгандыр дигән өметтә, нәтиҗәләрне генә көтәсе кала.