29-30нчы март көннәрендә "Татарстан хәзинәләре" шәһәр программасының 6нчы туры узды. "Без табигать балалары" дип исемләнгән әлеге очрашу квест-уен формасында оештырылып укучылардан Татарстан Республикасы территориясендәге сулыклар, үсемлек һәм хайваннар дөньясы турында белемнәренең ныклы булуын тәлап итте. Дүрт станциягә бүлеп уздырылган әлеге уен, чын мәгънәсендә балалардан җирлектә ориентир күнекмәләренең дә ни дәрәҗәдә булуын сынады. Бер станциядә укучыларны кроссвордка җаваплар табу көтсә, икенченсендә дөрес җаваплар арасыннан дөрес булмаганын аерып алу, өченчесендә сүз байлыгын сынау, ә менә дүртенчесендә исә рәсем ясау мөмкинлекләрен һәм фантазия байлыгын  тикшерү биремнәре көтте. Очрашу беренче яртыеллык нәтиҗәләре буенча иң югары баллар алган төркемнәрне бүләкләү, диплом һәм баллы бүләкләр тапшыру белән тәмамланды.