Балалар өчен уздырылучы конкурс-бәйгеләрнең күплегеннән башлар әйләнә. Нинди генә төрләре юк аралараында: белем ягын тикшерү дисеңме, иҗади конкурслар дисеңме, талантлар барлау конкурслары, җаның ни тели сайлап ал. Тик шулар арасында аеруча кыйммәткә ия халык җәүһәрләрен барлаучы бәйгеләр игътибарга лаек. Шундыйлар рәтендә “Бәллүр бишек” ачык төбәкара балалар фольклор бәйгесе дә бар. Менә әле икенче ел гына уздырылуына карамастан киң җәелеш тапкан әлеге бәйге үзенә Мөслим, Ютазы, Түбән Кама, Тукай, Лениногорк, Кукмара районнарының һәм Яр Чаллы шәһәренең фольклор коллективларын җыйды. Күпмедер халыклар  дуслыгы бәйрәмен хәтерләтте әлеге бәйге. Чыгышлар татар, чуаш, мари, керәшен, хәтта итальян халык биюләрен, көнкүрешен, уеннарын яктыртып искиткеч бер бәйрәмгә әверелде. Һәрбер чыгыш ясаучының, соломы ул, ансамбльмы, югары әзерлек белән килгән булуы шатландыра. Коллектив җитәкчеләренең һәрбер чыгышка җаваплы каравы, үз эшләренең осталары  булуы, осталыкларын балаларга тапшырулары тагы да күңелне күтәрә. Мондый җитәкчеләр, коллективлар булганда халык җырлары, уен-көлке,  уен кораллары – халык җәүһәрләре яшәр, югалмас.