Йолдызлар, йолдызлар... Табигатьнең аңлатып бетерә алмаслык, бик тә гаҗәп һәм матур әлеге күренешләре белән кемнәр генә сокланмыйдыр. "Созвездие-Йолдызлык" фестивале тарафыннан ел саен ачыла торган талантларны да нәкъ менә шул йолдызларга тиңләп булыр иде. Никадәр искиткеч талантка ия балалар катнаша әлеге бәйгедә. Вокал, хореография, конферас номинацияләрендә көч сынашучы балалар арасында чыннан да чын профессионаллар дәрәҗәсендә чыгыш ясаучылар булу күңелне күтәрә.

Бу елда безнең нәни конферансларыбыз - "Сихри сәхнә" театр студиясе катнашучылары Сәмирә Иксанова һәм Эльвира Шәрипова да үз көчләрен сынап карарга булдылар. Уңышлы гына чыгыш ясап, зона турына үтеп, "КамАЗ" мәдәният йортында чираттагы концерт номерларын игълан итәчәкләр. Әйтергә кирәк, чыгыш ясаулар җиңелләрдән булмаячак: Тукай районы, Алабуга, Минзәлә, һәм Яр Чаллы шәһәрләренең иң-иңнәре генә җыелачак ич әлеге турга. Ләкин шулай булуга карамастан, безнең чыгышлар жюри күңеленә кереп калыр дигән өметтә, кызларыбызга зур уңышлар телибез.