“Театр – яктылыкка, нурга илтә” дигән Бөек Тукаебыз. Шуны истә тотып, өченче ел рәттән уздырылучы, 17 ноябрьдә башланган театр атналыгы мәктәбебезнең матур традицииясенә әйләнде. 11 көн буена сузылган театр атналыгы 28 ноябрь көнне Әниләр бәйрәмендә зур тамаша белән төгәлләнде. Гран-при кубогына көрәштә үз номинацияләрендә беренче урыннарны яулаган  сыйныфлар катнашты. Беренче булып сәхнәгә “Юл йөрү кагыйдәләре” темасына куелган спектакль белән 4 а сыйныфы аяк басты. Икенче булып Әмирхан Еникинең “Бер генә сәгатькә” әсәреннән өзекне 7 б сыйныфы тәкъдим итте. 10 а укучылары Кәрим Тинчуринның “Сүнгән йолдызлар”, 5 в - Габдулла Тукайның “Эш беткәч уйнарга ярый” һәм 2 б сыйныфы Роза Хафизованың “Кашкарыйлар – озын гомерле” спектакльләрен күрсәтте. Жюри нәтиҗәләре буенча җиңүне 2 б сыйныф укучылары алды. Өстәп әйтәсем килә, әлеге атналыкта барлык сыйныфлар да катнашты, аларга дипломнар тапшырылды. Шулай ук “Иң яхшы егетләр роле”, “Иң яхшы кызлар роле”, “Икенче пландагы иң яхшы роль”,  “Иң яхшы музыкаль бизәлеш” номинацияләре җиңүчеләре билгеләнде.