"Язучы дәрес бирә", "Әдип эзләре буйлап" проектларын "Адымнар" мәктәбенең туган тел һәм әдәбият укытучылары инде дүртенче ел уңышлы тормышка ашыра. Проектларның нәтиҗәсе дә шатландыра: укучылар ел саен шәһәр, республика һәм халыкара олимпиадаларда иң югары урыннарны яулыйлар. Бүген, 23 сентябрь көнне, Бондаренко корпусының туган тел һәм әдәбият фәннәре буенча олимпиада командасы Рамил Гомәр улы Ханнанов җитәкчелегендә Чистай районы Яуширмә авылына сәяхәт кылды. "Әдип эзләре буйлап..." Биредә алар халкыбызның бөек улы, язучы, драматург, публицист, җәмәгать эшлеклесе Гаяз Исхакыйның тарихи-мемориаль һәм этнографик комплексын карадылар. "Кәҗүл читек", "Жан Баевич", "Көз", "Зөләйха", "Сөннәтче бабай", "Ике йөз елдан соң инкыйраз" кебек әсәрләре аша әдәбият сөюче яшьләргә билгеле әдипнең тормыш һәм иҗат юлы, әдәби мирасы, шәхси әйберләре белән танышу бик кызыклы булды. Киләсе атнадан быелгы олимпиада хәрәкәтенең мәктәп этабы башлана. Уңышлар юлдаш булсын!