КФУ Идел буе регионара үзәге белән берлектә 14 нче ноябрьдә “Татар теле һәм әдәбияты укытуда мотивлаштыру ысуллары һәм формалары” темасына татар теле һәм әдәбияты укытучыларының бөтенроссия семинары булып узды. Семинарда Э.Р.Фатыйхова, Д.Ф.Зарипова, А.Ф.Нәбиева башлангыч сыйныфларда яңа федераль дәүләт белем бирү стандартларына корылган, Р.М.Миначева, И.Р.Мөхетдинова урта сыйныфларда искиткеч дәресләр күрсәттеләр. Инглиз теле укытучысы О.М.Сафина, татар теле һәм әдәбияты укытучылары Ә.Ә.Шәрипова, Л.Н.Миндубаева Татарстан Республикасының танылган кешеләре циклыннан “Герой-шагыйрь Муса Җәлил” темасына интегральләштерелгән ачык чара тәкъдим иттеләр. Чара югары дәрәҗәдә узды. Кунаклар “Шалкан” мини спектаклендә 4а татар сыйныфы укучыларының уйнауларына бик нык сокландылар. И.М.Миндубаев “Татар теле өйрәнүнең абруен күтәрүдә информацион технологияләр” мастер-классында кунакларны, формулалар кулланып, тест төзү серләренә өйрәтте. Педагогик идеяләр мини фестивалендә укытучылар үзләренең эш тәҗрибәләре белән уртаклаштылар. Килгән кунаклар семинарга бик югары бәя бирделәр, һәр чара уңаеннан үзләренең җылы фикерләрен белдерделәр. Пермьнән килгән укытучылар да бик файдалы семинар булуын ассызыкладылар.