2016 елның 18  ноябрендә  Татарстандагы иң толерантлы авылларның берсе  “Зур Мәшләк урта гомуми белем бирү мәктәбе” базасында  “Сәләтле балаларны фәнни-тикшеренү эшенә тарту һәм проект эше белән җитәкчелек итү үзенчәлекләре” исемле татар теле һәм әдәбияты укытучылары семинары  гөрләп үтте. Бу семинар кысаларында укучылар өчен “Гаязов укулары” муниципаль  фәнни-гамәли конференциясе   эшләде. Анда районның төрле мәктәпләреннән килгән укучылар фәнни докладлары белән чыгыш ясады. Алар өчен «Әхмәт Гадел иҗатының үзенчәлеге», «Үткәнен белмәгән кешенең киләчәге юк», «Әхмәт Гадел мирасы һәм хәзерге заман» дигән секцияләр эшләде. Шул ук вакытта Зур Мәшләк мәктәбе укытучылары В.Вафина, Ч.Сәхәбетдинова, А.Нуриева, Ф.Гарипова, Ф.Миңһаҗетдинова районның татар теле һәм әдәбияты укытучылары өчен мастер-класслар күрсәтте.  Укучылар, Әхмәт Гадел (Гаязов) иҗатына багышлап, «Син яшәрсең, мең яшәрсең, сиң – шагыйрьләр солтаны» дигән әдәби-музыкаль чара да күрсәтте.

    «Гаязов укулары»на Казаннан “Мәгариф” журналының бүлек мөхәррире Сабирҗанов Т.Ә., КДЭУдоценты, техник фәннәр кандидаты Нуруллин Р.Г., Язучылар берлеге әгъзалары ТР атказанган мәдәният хезмәткәре Мостафин Ш.Ә.  кебек күренекле шәхесләрнең  кунак булып килүе нур өстенә нур өстәде.

     Соңыннан конференциядә чыгыш ясаган укучыларга Дипломнар, таныклыклар һәм истәлекле бүләкләр тапшырылды.