Районыбызның танылган кул эшләре осталары Фәрит абый һәм Лилия апа Вафиннар белән берлектә мәктәбебездә “Бизәкләрдә халкым мирасы” дип исемләнгән иң оригиналь татар орнаментына конкурс игълан ителгән иде. Конкурс шартлары буенча, беренче урын алган рәсем мендәр тышына чигелеп, җиңүчегә тапшырыла. Бүген бу бәйгегә нәтиҗә ясалды һәм Фәрит абый белән Лилия апа җиңүчене бүләкләү өчен махсус укучылар белән очрашуга килделәр. 4 сыйныф укучысы Нигъмәтҗанова Диләрәнең рәсеме 35 катнашучы арасында үзенең оригинальлеге белән жюри әгъзаларының күңелләренә хуш килде һәм мендәр тышына төшерелеп җиңүчегә тапшырылды. Шулай ук укучыларга татар орнаментының килеп чыгышы, аның төрләре, чигү эшенең нечкәлекләре турында кызыклы әңгәмә дә уздырылды. Күренекле галимнәр әйтүенчә, тарихыбызга кагышлы бер генә әйбәрне, бер генә бизәкне дә онытырга һәм югалтырга хакыбыз юк безнең. Болар – безнең әби-бабаларыбызның үзләреннән соң килгән буыннарга мирас итеп калдырган байлыгы. Безнең бурычыбыз – бу мирасны саклау, өйрәнү, киләчәк буынга тапшыру.