Язгы каникулның һәр көнен файдалы үткәрергә тырышабыз. Бүген 7 нче сыйныф укучылары сыйныф җитәкчеләре Миләүшә Газинуровна һәм тәрбиячеләре Гөлнара Илдусовна белән берлектә “Саба туган якны өйрәнү” музеена бардылар. Музейлар – ул киләчәгебезнең дәвамы, чөнки укучылар музейда тарих, әдәбият, география һәм башка дәресләрдә ишеткәннәре турында фикер йөртүне дәвам итәләр.
    Укучыларга һәр экспонатның тарихын музейның фонд саклау хезмәткәре Заһидуллина Ләйсән Рияз кызы сөйләп таныштырды: “Саба туган якны өйрәнү музееның төп максаты, тирәнтен тарихыбызны чагылдыру. Районыбыз тарихына кагылышлы фәнни-гамәли материалларны туплау, өйрәнү, аларны музейның тәрбияви белем, фәнни – агарту эшчәнлегендә файдалану”.
   Укучылар музейда төрле төрдәге экспонатлар исәптә торуын күрделәр (археология, нумизматика, этнография, архив документлар һ.б) Балалар үзләренең кызыксынуларын да күрсәттеләр, төрле сораулар бирделәр, күп мәгълүмат алдылар. Бүгенге эскурсия укучыларда патриотизм тәрбияләүдә бербөтен тәрбия үзәге булып торуына шигебез юк.