Бүген, 10 нчы сентябрьдә, мәктәбебездә  Дөньякүләм белем тикшерү “Татарча диктант” акциясе булды.  Акция әдәби татар телен өйрәнү,  татар теленә кызыксынуны арттыруга, татар тел белгече һәм укытучысы профессияләрен популярлаштыруга юнәлтелгән. Чарада  300 кеше катнашты, шуларның 150 се онлайн форматта язды. Диктант язу 7 аудиториядә барды. Диктант яздыручылар, хөрмәтле кунакларыбыз – шагыйрә, 4 китап авторы Гыймаева Эльмира Рәшит кызы, Саба районы мәгариф бүлеге җитәкчесенең тәрбия эшләре буенча урынбасары Шәфыйкова Гөлнар Илдар кызы һәм Саба районы каршындагы Яшьләр парламенты рәисе, “Бердәм Россия”нең “Яшь Гвардия”се Саба җирле бүлегенең җитәкчесе Халиев Айнур Рафыйк улы. Иң өлкән катнашучы 3 нче сыйныф укучысы Хурамшин Әскәрнең әбисе Нәгыймова Гөлҗәүһәр Хәкимулла кызының (71 яшь)  акциядә катнашуы безне бик сөендерде. Иң яшь катнашучылар арасыннан 7 нче сыйныф укучылары зур игътибарга лаек.
     Әлеге акциядә катнашкан кунакларга, әти-әниләргә, әби-бабайларга, укытучыларга, укучыларга зур рәхмәтебезне җиткерәбез. Туган телебездә аралашыйк, аны саклыйк, яклыйк, киләчәк буынга тапшырыйк.