2 нче октябрь көнне 1 нче сыйныф укучылары белән тәүге тапкыр “Без йолдызлар булырбыз!” исеме астында җыен үткәрелде. Нәни дусларыбыз тарафыннан зур кызыксыну белән кабул ителде, күп яңалыклар үзләштерделәр, бик актив катнаштылар. Максат итеп 1 нче сыйныф укучыларын эзтабарлар сафына кабул итеп алу, аларны намуслы, кыю, тырыш эзтабарлар (йолдызлар) булырга, законнарны белергә һәм төгәл үтәргә куелган иде. Очкын җибәреп, җыеныбызны бик матур сүзләр белән дәвам иттек: “Безнең күңелләрдә кабынган очкын, сезнең күңелләргә барып җитеп, яхшы эшләргә өндәсен!”. Аннары аларның игътибарлыкларын тикшереп, уен уйнап алдык. Аннары ни өчен аларга “йолдызлар”исеме бирелә, нинди законнары бар, нинди сыйфатларга ия булырга тиеш икәнлекләре белән таныштык. Укучыларыбыз үзләре дә шигырьләр өйрәнеп килгән иделәр. Ахырда кабаттан очкын җибәреп, “йолдызларыбыз”га изге теләкләр теләп, җыеныбыз тәмамланды.