Бүген «Кояшкай”группасы эзтабарлары (2 класс) белән “Эзтабарларның үсеш баскычлары” темасына сбор үткәрелде. Сборда “Галстучная страна” һәм “Эзтабар юлдашы” программалары белән таныштылар.  Игътибарлылыкка үткәрелгән уенда Хабибуллина Зилә - “Иң игътибарлы укучы” булды.

Мәктәбебездә бүген 1-7нче сыйныф укучылары белән "Уңыш бәйрәме" уздырылды. Мәктәптә иртәдән үк бәйрәм рухы булды. Һәр сыйныф зәвыклы итеп көзге муллыктан күргәзмә өстәлләр тезде. Укучылар көзге муллыкка, уңыш кызы "Сөмбелә" гә багышлап чыгыш ясадылар. Бәйрәм күтәренке рухта үтте.

Бүген мәктәбебездә Хәтер көне билгеләп үтелде. Гомуммәктәп линейкасында тарих укытучысы Наилә Мансуровна укучыларны әлеге көнгә багышланган вакыйгалар тарихы белән таныштырды.

Бүген мәктәбебездә үзидарә көне үтте. Өлкән сыйныф укучылары алдан ук дәресләргә әзерләнә башладылар, укытучылар белән киңәштеләр. Әлеге көн укытучыларның яңа составы белән танышудан башланды. Укыту эшләре буенча директор урынбасары  дәрес планнарын раслагач, укытучылар дәресләргә таралышты. Биш дәрес беткәннән соң, администрация барлык укытучыларны, укучыларны, шулай ук 12нче сыйныф укучыларын да линейкага җыеп, үтеп баручы көнгә анализ ясады. 

 Бу көн  укучыларга укытучы хезмәтенең авырлыгын, бу эштә хезмәт сөючәнлек һәм түземлелек кирәк булганын аңларга ярдәм итә.  Үзидарә көне үтте, ә күңелләрдә яхшы кәеф әле озак вакытлар сакланыр.

 “Салават күпере” группасы (3 Б сыйныфы) эзтабарлары әбиләрен  мәктәпкә кунакка чакырып  “Әбекәй - алтыным, минем иң якыным” дип исемләнгән бәйрәм оештырдылар. Укучылар әбиләренә матур җырлар, биюләр, шигырьләрдән торган концерт күрсәттеләр. Үз куллары белән ясаган бүләкләрен һәрбер укучы әбиләренә булган иң җылы сүзләрен әйтеп тапшырдылар.  Бәйрәмдә  “Әби – онык” бәйгесендә дә һәркем бик теләп катнашты. Бәйрәмнең өченче өлеше чәй табыны артында дәвам итте. Ахырдан истәлек фотоларына төштеләр. Әлеге бәйрәмнән укучылар,  бигрәк тә әбиләр зур канәгатьләнү хисе кичерделәр. Әбиләр үз оныкларының шундый матур, якты, җылы, бөтен шартлар тудырылган мәктәптә белем һәм тәрбия алулары өчен чиксез шатлануларын белдерделәр. Оныкларына, укытучыларына изге теләкләрен җиткерделәр.

    5нче октябрь көнне гаделлек, зирәклек кебек күркәм сыйфатларны үзләренә туплаган һөнәр ияләре - укытучылар көне. Бәйрәм көне уңаеннан мәктәптә төрле күңелле чаралар үтте. Һәр сыйныфта бәйрәм тантанасы рухы күзәтелде. Шарлар, төсле акбурлар белән язылган җылы сүзләр, чәчәкләр... Барысы да яраткан укытучылар хөрмәтенә. Мөгаллимнәребез хөрмәтенә 5нче сыйныф укучылары "Рәхмәтемнең иң олысы сиңа, укытучым!" исемле әдәби-музыкаль кичә оештырдылар. Бәйрәм матур җырлар, биюләр, шигырьләр һәм котлаулар белән үрелеп барды.

   Укытучыларыбыз "Балкыш" тернәкләндерү үзәгендә ял итүче ветеран укытучыларыбызны да бәйрәм белән котладылар.

Мәктәбебезнең физик тәрбия укытучысы Галиев А.Г. укытучылар бәйрәме уңаеннан район мәдәният йортында үткәрелгән бәйрәм кичәсендә "Мәгарифтәге казанышлары өчен"  күкрәк билгесе белән бүләкләнде. Азат Гыйлмулловичны чын күңелебездән котлап, алга таба да зур уңышларга ирешүен телибез.

Мәктәбебез "Иң күп табыш кертүче мәктәп" номинациясендә призер булды. Әлеге хезмәткә өлеше кергән барлык укучыларыбызга, укытучыларга, хезмәткәрләргә зур рәхмәтебезне җиткерәбез.

Бүген мәктәптә балигъ булмаган балалар белән эшләү инспекторы Сибагатов А.А. һәм ГАИ хезмәткәре Закиров Д.Р. белән очрашу үткәрелде. Айгиз Анасович укучыларга терроризм турында сөйләп, эчтәлекле видеосюжет күрсәтте, соңыннан җәй көне укучылар тарафыннан ясалган хокук бозу очраклары турында аңлатып, балаларны вакытны әрәмгә уздырмыйча, тырышып укырга өндәде. Дамир Рамилевич юлда йөрү кагыйдәләре турында сөйләп, сораулар ярдәмендә укучыларыбызның  белемнәрен һәм юл билгеләрен белүләрен тикшерде, тулы мәгълүматлар бирде, укучыларны  юл йөрү кагыйдәләрен төгәл үтәргә өндәде. Әлеге очрашу укучыларыбыз өчен бик файдалы булды.

Бер-берләренә иңне иңгә куеп, лаеклы ялга кадәр намуслы хезмәт иткән, район, республика күләмендә мәктәбебезне  танытуга үзләреннән  зур өлеш керткән, мәктәбебездә эшләп лаеклы ялга чыккан өлкән буын кешеләре бүген бездә кунакта булды. Хөрмәтле өлкәннәребезгә мәдәният йортында укучыларыбыз көче белән әзерләнгән концерт тәкъдим ителде, ә соңыннан бәйрәм чәй табыны артында дәвам итте.